Aitagurea otoitz
laburra da. Jesusek bere jarraitzaileei ondaretzat utzi zien bakarra. Otoitz
bitxia da. Kristau guztiek errezatzen dute, baina ez du Kristori buruz hitz
egiten. Eliza guztietan errezatzen da, baina ez da inongo elizarik aipatzen.
Katolikoek igandeko mezetan esaten dute, baina ez du hitz erdi bat esaten inolako
erlijiori buruz. J.D. Crossanek dioen bezala, “otoitz iraultzailea da,
historiaren ikuspegi berria aldarrikatzen duena. Errotikako adierazpena eta
itxaropen-ereserkia da, lur guztiari zuzendutako hizkeran esana”.
GURE AITA ZERUETAN ZARENA
Zu
zara gure Aita, gogoan izan guztiok garela zure alabak eta semeak.
Guztiona
zarelako zaude zeruetan. Ez zaude inongo tenpluri lotuta, ez lurreko inongo
leku santuri. Ez zara herri batena ez arraza pribilegiatu batena. Ez zara
inongo erlijiorena. Ez zara onena bakarrik. Guztiok dei zaitzakegu Aita gisa.
SANTU
IZAN BEDI ZURE IZENA
Hona gure lehen
desioa gizadi guztia minez dagoen uneotan. Zure Aita izena aitortua eta
errespetatua izan dadila. Ez dezala inork mespretxatu zure seme-alabei kalte
eginez. Ez dezagula galdu Zurekiko konfiantza. Kanporatuak izan daitezela
gizatasuna kentzen diguten jainko eta idolo guztien izenak. Banatzen gaituen
eta senide izaten uzten ez digun dirua; gure gerrak elikatzen dituen
indarkeria; ahulak arbuiatzera garamatzan boterea.
ETOR
BEDI ZURE ERREINUA
Gure artean Zu
bazara errege, justizia , berdintasuna eta bakea nagusituko dira lurrean.
Elkarrekin aurre egin ahal izango diegu lurreko arazoei. Anai-arreba gisa
elkarturik menderatuko ditugu gizadia penatu lezaketen pandemiak. Aberatsak ez
daitezela behartsuen gain nagusitu; herrialde ahaltsuek ez dezatela herrialde
ahulez abusatu; gizonek ez ditzatela emakumeak menderatu. Etor bedi zure
erreinua eta nagusitu bedi senidetasuna lurrean.
EGIN
BEDI ZURE NAHIA ZERUAN BEZALA LURREAN ERE
Egin bedi zure
nahia, ez gurea. Koronabirusa erakusten ari zaigu dena burutu gabe dagoela
lurrean, dena erdizka bizi dugula. Ez dugu ikasi nahi gizakiak hauskorrak eta
zauriberak garela, hemen ezin dugula eskuratu barne-barnetik irrikatzen dugun
betetasuna. Aita, zure Ontasun hondogabean soilik izan dezakegu uste ona.
Ez bedi egin, beraz, guk nahi duguna,
geurekoikeriak, kontsumismoak eta gure ongizateak eraginik. Egin bedi Zuk nahi
duzuna, guztion ona bilatuko baituzu beti.
EMAGUZU
GAUR EGUN HONETAKO OGIA
Gizadi
osoarentzako hain gogorrak diren une hauetan, inork ez dezala ogi faltarik
izan. Ez dizugu dirurik eskatzen ez ongizaterik, ez dugu aberastasunik nahi
pilatzeko, guztiontzako eguneroko ogia besterik ez. Koronabirusaren pandemia
honek betiko oroitaraz diezagula bizitza dela gauza guztietan lehena: goseak
daudenek jan ahal izatea; pobreek negar egiteari uztea; migratzaileak eta
errefuxiatuak gurean harrera izatea, bizirik iraun eta etxea eduki ahal izan
dezaten.
BARKATU
GURE ZORRAK
Aita, barkatu gure
zorrak: gure axolagabekeria, gure sinesgogorkeria, Zugan konfiantza izateko
dugun ezkorkeria. Urte hauetan zehar, barrutik asko aldatu gara guztiok.
Kritikoagoak bihurtu gara, baina baita sendotasun gutxiagokoak ere.
Axolagabeagoak gure ongizatea ez den ororekiko, baina inoiz baino kalteberagoak
edozein krisiren aurrean. Ez zaigu erraza gertatzen sinestea, baina zaila
gertatu behar zaigu ezertan ez sinestea. Aita, barkaiguzu eta esnatu gure
barne-bizitza.
GUK ERE
GURE ZORDUNEI BARKATZEN DIEGUNEZ GERO
Ikaratuta bizi
garen une honetan, heriotzaren muga saihestezinaren aurrean guztiok sentitzen
dugun ezinaz jabetu garelarik, guk ere barkatu nahi diogu elkarri, batak
besteari. Ez dugu hauspotu nahi inoren aurkako bazterketarik ez erresuminik.
Esperientzia latz hau anai-arreba bezala bizi nahi dugu.
EZ
GAITZAZU UTZI TENTALDIAN ERORTZEN
Ahulak eta
mugatuak gara. Orain inoiz baino gehiago ari gara hori bizitzen. Gure bizitzak
eta besteenak hondatu ditzaketen erabakiak hartu eta huts egiteko arriskuan
aurkitzen gara beti. Horregatik, ez gaitzazu utzi Zu ahazteko eta baztertzeko
tentaldian erortzen, Aita. Piztu gugan zure ontasunarekiko konfiantza. Inoiz
baino gehiago behar zaitugu. Zuk ireki ditzakezu bideak gutako bakoitzarekin
topo egiteko: sinestunekin eta ez sinestunekin, ateoekin edo agnostikoekin.
Guztiok senti ahal izan dezagula gure barnean zure indar isila baina
eraginkorra.
BAINA
ATERA GAITZAZU GAITZETIK
Gure hutsegiteen
erantzule gara, baina baita biktima ere. Gaitza eta bidegabekeria ez daude gure
baitan bakarrik. Egituretan eta erakundeetan ere badaude, politiketan eta
erlijioetan ere bai. Horregatik, garrasi batekin amaituko dugu otoitza: Aita,
atera gaitzazu gaitzetik! Egun batean beteko da guztiok irrikatzen dugun zorion
betea. Lurrean gozatu ditugun ordu alai eta zoriontsuak nahiz bizipen garratzak
eta mingotsak; erein dugun maitasuna, justizia eta elkartasuna, baita egin
ditugun okerrak eta baldarkeriak… Dena zorion bete bihurtua izango da.
Jada ez da heriotzarik ez minik izango. Inor
ez da egongo tristerik, inork ez du negar egin beharko. Hasierako elkarteetako
batean egindako idazki kristau batek hitz hauek jartzen ditu Jainkoaren ahotan:
“Egarri denari neuk emango diot
doan biziaren iturburutik” (Apokalipsia 21, 6). “Doan”, alegia, ez gure merituengatik;
“bizi-egarri denari”, eta zein ez da betiko biziaren egarri? Bakoitzak
erabaki behar du nola bizi nahi duen eta nola hil nahi duen. Nik sinesten dut
eta uste on dut errealitatearen azken misterioa, batzuek “Jainko” deitzen
duguna, beste batzuek “Energia”, beste batzuek “Transzendentea” eta beste
batzuek “ezer ez”, Ontasun Misterio bat dela eta harengan aurkituko dugula
guztiok gure izatearen Betea. AMEN.
Jose Antonio Pagola, 2020ko martxoaren 25ean
No hay comentarios:
Publicar un comentario