Hiru urtetan, zuen artean
ibili naz hona, hara:
Kanala, Albiz, edo Ajangiz,
Artien, ta Mendatara,
Errenterian san Bartolome:
Arratitik Gernikara.
Begitan malko, bihotzak negar,
jaso zinez agur bana,
eskerrik asko lankide, lagun,
partekatuz amets lana:
sinodaltasun bide horretan
ospatzaile talde dana.
Kate luzea ezin da eten
herriak badaki nora,
erroak eta ametsak lotuz
euskera eta serora:
horren lekuko jator zarie
gurean Bizian gora!
Beste talde bat eskertu barik
gaurkoan ezin dot laga,
Ruth eta Aritz, neska-mutilok
zuena ezin da paga,
aitita legez hartu nozue:
gora beti Kosnoaga!
Gau ilunean gu ez galtzeko
behar dogu kriseilua,
eliz gauzatan, alkar josteko,
untzea eta mailua.
Gernikaldean argi ta hari
barrutiko kontseilua.
Hainbat senide agurtu doguz
esperantzaz hiletatan.
Organo alai, gitarra be bai,
txistu hotsa ermitatan.
Gure fedea pozarren kanta
familiako mezatan.
Bertso ta kanta, ikusi arte
zuentzat esker ugari,
fede handiko andra zintzoak
Mertzedeko otoilari,
zuek beti prest Mertxe ta Belen
Rosario, Ana Mari.
Doinua: Ilun ikarak, Imanol
No hay comentarios:
Publicar un comentario