Liburu barri bat landu eta argitaratu dau Sebastian Gartzia Trujillok. Behar eta neke askoren emoitza. Gaia Lauaxeta olerkariaren pentsamendu erlijiosoa eta jardueraren azalpena. 327 orrialdetan Esteban Urkiaga poetaren bizitza eta lan poetikoa eta kazetaritza lanak aurkezten deuskuz. Lauaxetaren pentsamendua eta jarduera, Leioa, 2022.
Ikuspegi zehatz eta
original batetik: Esteban Urkiagaren euskaltzaletasuna eta abertzaletasuna bere erlijiotasunaren emoitza laikoak ete dira?
Bere heriotza martiritza bat legez ulertu daiteke? Itaun sakonak beraz, ikerlariak argitu gura
dauzenak. Horretarako,oinarrian, Lauxaterai buruz dagoen bibliografia zabala
lantzen dau. Bere originaltasuna, ordea, fedearen ikuspuntua erabiltzea
litzateke,alderatu poetaren lana Ebanjelioko Jesusen berbakaz eta erlijioaren
Jainkoagaz.
Lanaren tratamendua bibliografian
oinarritzen da. Pena bat. Kapitulurik indartsuenak, nire ustez, amaierakoak
dira. Lauaxetaren pasioa, heriotza, kartzelako olerkiak eta testamentua. Eta
idazleak justifikatu gura dauenaren giltza, azken honetan datza. Ebanjelioak
idatzi ziranean ere, lehen lehen, Jesusen nekaldia (pasioa) eta heriotza idatzi
ziran. Ondoren, bere berbak eta ekintzak. Azkenean, bere jaiotza. Liburu
honetan Lauaxetaren jaiotza eta jesuitetan izandako heziketa da abiapuntua.
Ondoren bere lana euskaltzale eta abertzale legez, bere “ordezkapen erlijioa” laikotuz,
inoiz galdu barik bere sinismena. Eta azkenean, preso jausi ostean, eta
frankistek fusilatu baino aurretik, kartzelan igarotako egunek barriro loratzen
dabe bere barruan gaztaroan hazitako fedea.
Liburuaren egileak
alkarrizketa bat osatu gura dau, zubi lana esan daiket, Lauaxetaren
pentsamendua eta jarduera, alde batetik, eta kristau erlijio katolikoaren pentsalariak,
bestetik. Argi geratzen da poeta miresten dauela eta goraipatu egiten dauz bere
ideiak, koherentzia, zalantzak, bilakaera… Erronka gatxa, Vatikanoko II. Kontzilio
aurreko erlijio giroa aztertzea gaur egungo pentsalari eta teologoen gogoetak
eta paradigmak erabiliz. Errezagoa,
heriotzaren aurreko otoitz, poema eta pentsamenduak aztertzeko unean.
Argi geratu dana, hauxe
da, frankisten balek, Gasteizko kanposantuaren ormaren kontra poetaren olerkia
mututu ebenean, fededun baten otoitza zerura jasoa izan zala eta zabaldu gure
egunok arte. Martirien odolak fededunak sortzen badauz, martiri baten aurrean
gagoz. Azkeneko hiru kapituluak nahiko dira liburu osoa justifikatzeko. Osorik
irakurrita, azken aberatsagoa. Baina atzetik aurrera irakurtzea aholkatzen dot.
Hobeto ulertzen dalakoan nago.
Jose Mari Kortazar
No hay comentarios:
Publicar un comentario