Garizuma 2018: Fedearen arbola bizia ez da sakristian hazia.

Garizumea hasi dogu, berrogei egun bidean, alkarregaz bidean, Jesusi jarraitu gurean, Pazkora begira.

         Lehen domeka honetan basamortuan gagoz, Jesus kontenplatzen, gure tentaldiei aurre egiten.

         Arratiako Elizaren tentaldi bat hauxe litzateke: sakristian gordeta bizi gure sinismena. Kanpoan hotz, gurea ez dago modan, sakristiaren sutondoan berotan mantendu.

         Aita Santuak “urteeran” dagoan eliza eraikitera dei egiten deusku.

Markosen ebanjelioan be Jesus ikusten dogu Jainkoaren Erregetza zabaltzen eta gauzatzen sinagogan, baina ez sinagogan bakarrik. Pedroren etxean eta gure etxeetan. Kalean. Itsas ertzean. Baztertuen ondoan. Gaixoen ondoan.

         Horregaitik aurtengo garizumako lema: Fedearen arbola bizia ez da sakristian hazia.

         Fruta arbolak inausteko sasoia da gurean. Gure fedearen arbolari be hainbat adar ebagi beharko deutsaguz, besteak fruitu ugariago eta ebanjelikoagoak emon dagiezan. Harrokeriaren adarra. Kontsumoaren adarra. Sakristian gordeta egotearen adarra.

         Eta aukera hobea izango dogu, Jesusek basamortuan legez, guk be Jainkoaren Berbea entzuteko otoitzaldian. Edota gogoeta interesgarrietan parte hartzeko edadetuen bakardaderai buruz, nerabeen jarrerari buruz, danon etxea dan herria eta lurra jagoteari buruz.

         Kendu alperkeria. Ekin otoitzaren, alkartasunaren eta austeridadearen bidetik!

         Berrogei egun bidean, alkarregaz bidean, Jesusi jarraitu gurean, Pazkora begira.

         Sekula sakristian

ez dogu hazia

fedearen seinale

arbola bizia;

Garizuman zuzendu

daigun gabezia:

fedearen mamian

dago justizia.

Edadetuak gugan

ugari bakarrik;

nerabeen jarrera

erronka da sarri;

mundua jagoteaz

dagigun aldarri…

Garizuman otoitz ta

beti bihotz-barri!