San Isidro

 San Isidro, maiatzak 15

Liturgia lagungarriak

MAIATZAREN 15 SAN ISIDRO

 

              Senideok: Isidro santuaren jaia ospatzen dogu gaur, pozik eta alaitasun handiz ospatu ere, Eliza osoarekin bat eginik. Berau dogu-ta geure Zaindaria, kristau-elkarte honen eredu eta laguntzailea. Gizon honek zintzo egin eban Ebanjelioko bidea, eta Jainkoarekin bizi da betiko zorionean.  Santuek argi egiten deuskue bizitzako bideetan eta laguntzaile ditugu eguneroko arazoetan. Ospatu daigun, bada, fede handiz eta esker onez Isidro santuaren oroipen pozgarria.

 

Damu-otoitza

 

Ospakizun honen hasieratik

jarri gaitezen, senideok, Jaunaren aurrean.

Berak deitu gaitu gaur elkartean jai hau ospatzera,

eta batzarraren erdian dogu Bera geurekin.

Biziaren Hitza eta Ogia emongo dauskuz,

eguneroko bidean argi eta indar izan dagiguzan.

Eskatu deiogun lehen lehenik geure pekatuen parkamena. (Isilunea).

 

-       Jesus Jauna, Zugan sinesten dabenen indar zaituguna: Erruki, Jauna.

-       Jesus Jauna, zure jarraitzaileen itxaropen zarena: Kristo, erruki.

-       Jesus Jauna, Zugan bizi diranei betiko bizia emoten deutsezuna: Erruki, Jauna.    Erruki dakigula...

 

Otoitza

 

Jainko Jauna,

Isidro nekazari santuaren umiltasunean

Kristogaz bate gindako bizitza isilaren eredua

emon deuskuzu;

egizu, gure eguneroko lanak

geroago ta gizakoiago bihurtu dagiala gure mundua,

eta, aldi berean, gorespena emon deiola zure izenari.

Zure Seme Jesukristo.

Lehenengo irakurgaia Santiagoren Epistolatik

 (Santiago 5,7-8.11.16-17)

 

         Beraz, senideok, izan pazientzia Jauna etorri arte. Begira nekazariari: lurraren fruitu ederraren zain egoten da eta pazientziaz itxaroten ditu sasoian sasoiko euriak. Izan pazientzia zuek ere, eta bete zaiteze adorez, laster etorriko da-eta Jauna.

Zoriontsu aitortzen ditugu horrelako eroapena izan ebenak. Ezaguna dozue Joben eroapena, eta badakizue zelako azkena emon eutson Jaunak; Jauna, izan ere, bihozbera eta errukiorra da-eta.

Aitortu batak besteari zeuen pekatuak, eta egin otoitz alkarren alde, sendatu zaitezen. Indar handia dau zintzoaren otoitz sutsuak. Gu bezalako gizakia zen Elias ere, baina sutsu egin eban otoitz euririk egin ez egian, eta hiru urtez eta sei hilabetez ez eban lurraren gainera euririk egin.

 

Jaunak esana 

Ebanjelioa

 

Jesu Kristoren Ebanjelioa San Joanen liburutik (Jn 15, 1-8)

 

            Aldi haretan, Jesusek esan eutsen ikasleei: «Neu naz egiazko mahatsondoa, eta nire Aita da nekazaria. Nigan fruturik emoten ez dauan aihena inausi egiten dau Aitak, eta frutua emoten dauana garbitu eta muskildu, frutu gehiago emon dagian. Zuek garbi zagoze dagoaneko, Nik adierazo deutsuedan berbeari esker. Zagoze Nigan, Ni zuekan lez. Aihenak berez, mahatsondoan ez badago, fruturik emon ezin dauan lez, ezta zuek ere, Nigan ez bazagoze.

            Neu naz mahatsondoa eta zuek aihenak. Norbait Nigan badago, Ni haregan lez, horrek frutu asko emoten dau; Ni barik ezin dozue-eta ezer egin. Nigan ez dagoana kanpora botaten dabe, ebagi eta ihartzen dan aihena lez; gero, batu, sutara bota eta erre egiten dabe.

            Nigan bazagoze eta nire berbak zuekan badagoz, eskatu gura dozuena eta izango dozue. Honetan azaltzen da nire Aitaren aintza: zuek, nire ikasle izanik, frutu asko emotean».

 

Jainko-herriaren otoitza

 

              Senideok: Eskatu eta emongo jakula esan deusku Jesusek. Aurkeztu deioguzan, bada, geure eskariak Jainko Aitari, Isidro santua otoitzean lagun dogula.

 

-       Eliza osoarentzat: Santuen oroipenak sinesmenean zintzo irauten eta maitasunean gogotsu bizitzen lagun deiskun, eskatu daiogun Jaunari.

-       ….ko gure herriaren alde eta bertan bizi garan guztion alde: gazte eta heldu, haur eta gurasoentzat; familientzat; herri-agintari, elkarte eta gizarte-erakunde guztientzat, eska daiogun Jaunari.

-       Gure herriko kristau elkartearen alde: gure fedea pozik bizi daigun eta familietan nahiz eskola eta beste azalpen guztietan fede hori haur eta gazteei egoki adierazten jakin daigun, eskatu daiogun Jaunari.

-       Gure artean nahiz edonon sufritzen eta oinazetan dagozanen alde; gaixorik eta larrialdian aurkitzen diranen alde, eskatu daiogun Jaunari.

-       Ospakizun honetan batuta gagozenon alde: Isidro santuaren jai honek batasunean eta elkar maitasunean aurrera eragin gaizan, eskatu daiogun Jaunari.

 

              Onartu, Jainko Aita, zeure herriaren eskariak: isuri egizu guregan eta mundu osoarengan zure maitasun Espiritua. Jesukristo gure Jaunaren bitartez. Amen.

 

Oparigaien gaineko otoitza

 

Hona hemen, Jauna, ogi eta ardao honeek:

Isidro nekazari santuak lez,

gizon emakumeak bere izerdiz emonazo deutsoz lurrari;

onartu egizuz eta santu egin.

Jesukristo.

 

Jaunartze ondorengo otoitza

 

Iguzu, Jauna,

hartu dogun sakramentu hau

maitasun handi baten hazia izan dedila gugan;

eta, gaur gogoratzen dogun Isidro santuaren antzera,

gure eguneroko ogia

geure anai-arrebakin banatzen jakin dagigula. Jesukristo.

 

 

 

Beti egon dira krisi sasoiak. Bibliako lehen liburuan, Hasierako liburuan, Faroia (gaur egun Trumo edo) eta Jose amets baten gainean dabiz berbetan. 7 behi argalek 7 behi lodi jaten ebezan amets haretan. Inork ezin asmatu ametsaren esangurea eta azkenean Jose da azalpena emoten dauena. Behi bakoitza urte bat zan. Lodiak ugaritasuna eta aurrerapena, argalak gosea eta eskasia, urte ederrak ahaztutera be eroango ebezenak, jango ebezenak.

         Krisi bakoitzak bere eragina izan dau gure herrietan. Lehen, oinez edo tranbian, fabriketara, herriak hutsituz. Orain, kontrako joera be badago. Batzuk guregana datoz lasaitasun bila, beste batzuk etxeak merkeagoak direlako.

         Gure herrian be igarri dira aldakuntzak.

         Herriko bizimoduak baditu bere bentajak. Auzotarren bizimodua, izateko eta bizitzeko modua. Bentana bat luzaro itxita badago arduratu, erosketak eroateko lagundu, auzokoari lagundu soloan edo ortuan, gaixoa bisitatu.

         Umeak ere gurean libreago dabiz kalean eta naturagaz hartuemonetan. Olgetako beste era bat.

         Ardurak ere badira.

         Erdera zelan nagusitzen dan gure plazan, gure umeengan.

         Betiko bide zabal batzuk orain itxita ikusten ditugu.

         Ondareari begira, pintadak ermitetan edo gure inguruan.

         Nekazari eta labradoreen zahartzea, ordezkapen naturala egiteko arazoak.

         Emakumeen zeregina, baloratzekoa dana, kontuan hartzekoa, eskertzekoa, herrian eta parrokian.

         Jarri daigun ba gure bizimodu guzti hau, bere gauzak onak Jainkoa bedeinkatu dagizan, eta gure ardurak, Jainkoak argitu gaizan.

         San Isidro dogu lagun Jainkoaren ondoan. Berak argitu gaizala gure beharragaz batera gure otoitzak ez dagian izan etenik. Beharra eta fedea uztartu daiguzan.

         

 

 Maiatzak 15

 

SAN ISIDRO nekazaria

 

 

Egia esan, San Isidro hau apala izan da, ezer gitxi dakigu bere bizitzatik. Baserriko landa ertzeko lore apal baizen usaintsua dirudi. Gehienetan bere bizitza zehatza baino gehiago, gainetik ezarri jakozan ipingiak agertzen dira. Hona hemen dakigun apurra.

 

XII. gizaldian Madril aldeko labrantza baten eguzki galdatan lan egiten eban nekazari ezezagun bat. Maria Toribiagaz ezkondua zan. Gaur egun Santa Maria de la Cabeza izenez ospatzen da. Mirariz edo lortu eben semetxo bat.

 

Beste baten menpeko langile zaildua dogu Isidro. Izerdiz ondo bustitako ogia jan eban. Lana eta otoitza etenbakoak izan ziran Isidroren esku-bihotzetan. Txikiak gora jaso eta handikiak apalduten dituan Jainkoak jaso eban hain gora Manzanares ibai ertzeko nekazari apal hau.

 

Bere sasoiko Alfontso VIa erregea gaur ahaztuta dagoan artean, Madril osoak eta inguruko guztiok goratzen eta ospatzen dogu San Isidroren jaieguna. Maisu eta idazle ospetsuak nok baino nok handiagoak dinoez San Isidrori buruz. Eta bere antzeko nekazari zintzoak eleizbira eta kalejira ederrak eskeintzen deutsoez. 1170. urte aldera hil zan.

 

1622. urtea gomutagarria da guretzat: Gregorio XV. Aita Santuak era batera ezarri ebazan aldaretan Loiolako Inazio, Xabierko Prantzisko, Avilako Teresa eta Isidro.

 

 

GAUR GURE TXANDA

 

Noiz edo behin agertzen jakuz santuen artean baserritar abarkadunak, idi buztarri eta guzti. Bizikera apala daroenen artean uste baino santu-santa gehiago dago. Santutasuna ez dago bizikereaz bat eginda, han zein hemen zuzen eta zintzo bizi izanaz baino. Jaungoikoak Berak bakarrik daki nekazari zintzo apalen artean zeinbat santu eta santa izan dan!

 

Espiritu Santuak ahal dau frutu ederrik atera holango kristauengandik. Bateoak ezarri deuskun goi bizitzaren mentu barria, gu mentu barri horri dagokiozan frutu gozoak emoten ahalegindu gaitezan.

 

 

GAUZA TXIKIAK

 

Baso bete ur doan,

minutu bi kalea zeharkatzen laguntzeko,

bazkalondo batzuk talde baztertuekin,

ordu batzuk egoera latzak entzuteko,

erosketa batzuk gitxiago...

 

Holako gauza txikitxoak

ez dabe desegingo pobretasuna,

ez dabe ateratzen azpigarapenetik,

ez dabez banatzen aberastasunak,

ez dabez gizarteratzen ekoizpen-baliabideak,

ez dabez husten Alí Babá-ren kobak,

ez dabe iraultzen ordena,

ez dabez aldatzen legeak...

Baina egitearen poza sortzen dabe

eta bizirik eusten zure nahiaren

eta gure eginbeharraren su-garrari.

 

Azken batean,

errealitatearen gain jardutea,

eta aldatzea apurtxo bat bada ere,

errealitatea aldagarria dala agertzeko

modu bakarra da.

 

Historiaren eta biziaren Jauna,

ez nadila ni izan eguneroko gauza txikiak

mesprezatzen eta egin barik

izten dabenetarikoa.

 

(Ulibarri, Fl.)

 

 

 Maiatzaren hamabost  aurten be badator

Nekazal herrietan         jaiak han eta hor

Udal aurrekontuak        ugari, emankor

Urtero ospatzeko         Isidro Labrador.

 

Maiatzaren hamabost  parrokian jaia

Lagun artean dogu      ospatze alaia

Egun hau igarota         atxurra ta laia

Eliza barritzeko            datorku garaia.

 

San Isidro Labrador    da gure laguna

Kristau jarraibidean      eredu doguna

Otoitza eta lanaz          ospatu eguna

Artean, auzo, plazan    jaso batasuna!

 

Doinua: Nire sentimendua nahi det deklaratu