Zein eder gizakumea

Zein diren eder lurra eta euria,
eguzkia eta eguratsa!
are ederrago halere
hauek hazi duten zuhaitza.

Zein diren eder, eder zuhaitzak!
zein eder, haitz, haritz eta arkaitzak!
are ederrago ordea
hauekin jaso den etxea.

Zein eder etxea!
are ederrago ordea
barruan bizi den gizakumea.

Zein eder gizakumea,
arra nahiz emea!
are maiteago halere,
honek sortu duen ametsa.

Eder ametsak sua eta ura,
haizea eta lurra ere
eta eder ederretan eder
hauek loratzen duten bihotza!!

Gizon handia da mundua, eta mundu ttikia gizona, J.A. Artze, Elkar, 1988