Ziortza 2013 bertsoak

Egia egi bada ezin da

ez erosi ta ez saldu,

gizona gizon bada ezin da

inor guzurrez zapaldu.

   Guzur-tratante askotxo dabil

hobe ondotik bialdu;

alde nahiz kontra, egia bada,

beti egia zabaldu.

                2

Usteak uste, munduan ez da

inor egiaren jabe,

alkarrizketan bila ta bila

guztiok haren mirabe.

Egi osorik inok ez dauka

Aita santua bada be,

"Bake bidean adiskidetu"

ezin da egirik gabe.

                   3

Ezinbesteko bake-atala

da justizia praktikan,

legea lege, baina trukean

txintxin jainkoa patrikan...

Tele-irratiz sorginak dantzan,

"oker ei dabiltz Aprikan..."

zintzo ta apal jokatu daigun,

hau ez da lortzen Korrikan.

 

               4

Bai, justizia justizia da

ta horretan ez huts egin,

badaezpada aurretiz neurtu

norbere buruarekin.

Bihotz zabalez jokatu ezik

helburua lortu ezin:

"Bake bidean adiskidetu",

hau posible izan dedin.

             5

Etsaikeriak gure Herria

bihurtu dau basamortu,

alkarlanean  aldatu daigun

loretegi eta ortu.

Anaiak gara, Herri bat gara

pozarren daigun autortu,

ezbardintasun danen gainetik

danon batasuna lortu.

             6

Bihotzak zabal, alkarri parka,

betor hauxe azkenean,

parkamenaren gozotasuna

geure hartuemonean.

Parka eskatu ta parka emon

egizko maitasunean:

"Bake bidean adiskidetu"

Jainkoaren izenean.

Bertsoak: Aita Martzel Andrinua

Doinua: "Gure Jainkoak egin banindu"