Berri onaren berri emaile: Bitoriano Gandiaga & Pello Zabala

Berrionaren berri emaile,

agur, zuri, Abendua;
esperantzaren atari zara,
iraupen luzez ondua;
betiraunera begira jartzen
diguzu adimendua
kunplitu zaren hortan bait zara
kunplikizun-agindua.
Berrionaren berri emaile,
agur, zuri, Abendua!

Etengabeko Abendu baten,
horrelaxe bizi gara
Jaungoikoaren erreinua noiz
osotuko den hartara;
espero eta nahi genuena
jadanik etorri bada,
Bere legamiz mundu guztia
behar du ondu ta para.
Etengabeko Abendu baten,
horrelaxe bizi gara.