Gaur, jada, utzi diogu herri hautatu izateari, ez baikinen izan honetarako hautatuak
Non zarete, munduko agintariok, Gazako
txikizioa ikusi eta, nik dakidala behintzat, hitz erdirik ere esan gabe?
Ez duzue ikusten Israel zenbat jende hiltzen ari den? Nola hil ere!
Lehergailuen suak kiskalirik, gorputzean matxura gabeko zatirik ez
zutela. Eta asko eta asko haurrak. Ba al dakizue zer den haur baten
aurpegi desitxuratua, taupadarik gabeko bihotza, arnasarik gabeko
birikak… gurasoen besoetan? Ez al zarete ohartu Gazako haurrek
Israelgoek eta mundu guztikoek bezalaxe egiten dutela negar? Zuek
bezalaxe maite dituztela gurasoek beren seme-alabak? Izan al duzue
ausardiarik jende koitadu horren irudiak zuen seme-alabei erakusteko?
Ala baduzue estrategiaren bat horrelakorik ikus ez dezaten, eta, inolako
kezkarik gabe, pistina dotoreetan igeri egin eta tokirik luxutsuenetan
diberti daitezen?
Ez da, gainera, behin egin dutela eta
kito! Israelen erasoa zikliko bihurtu da, behin eta berriz errepikatzen
da, Mikel Aiestaran EITBko korrespontsalak dioen eran: «Hirugarren
operazioa da ikusten dudana; hemen, dena bonbarda daitekeen guztia
bonbardaturik dago, eta bonbardaturikoa bonbardatzen jarraitzen dute».
Zein dira, baina, arrazoiak horrelako
gehiegikeria baten aurrean Komunitate Internazionala bestaldera begira
geratzeko? Nire irudipena betikoa da, interes ekonomikoak daude tartean:
petrolioa, armen negozioa, puntu geoestrategikoa… Ez, ez! Munduko
potentzia handien baimenik gabe Israelek ezin izango luke modu horretan
jarraitu, bereizketarik gabe, herri oso bat mazpiltzen, herri horretan
terrorista batzuk bizi diren aitzakian. Aurrekoan Jose Luis Elorzak
facebook-en galdetzen zuena parafraseatuz, zer irudiko litzaizueke
Donostia, Bilbo edo Bartzelona bonbardatzea, han terrorista batzuk
ezkutatzen direlako?
Esanguratsua Mijael Even David rabbiren
artikulua (‘El Diario Judio’ egunkaria: 2014/07/11), ‘Judua izateaz
lotsatu nintzen eguna’ du izenburua. Txema Arinasek elkarbanatu du,
facebook-en. Biziki gomendatzen dizuet. Honela ekiten dio: «Gaur,
Inkisizioaren suarekin elkartu gara». Eta azpimarratzekoa iruditzen
zait, besteak beste, bigarren paragrafoaren hasieran datorren esaldia:
«Gaur, jada, utzi diogu herri hautatu izateari, ez baikinen izan
honetarako hautatuak».
Era berean, merezi du aintzat hartzea
Bianditz Iraolak facebook-en egiten duen gogoeta: «Nola ahantz dezake
herri batek bere historia? Nolatan negar egin sarraski batengatik, beste
bat egiten ari zarenean?»
Bai Horixe, DV: 140717
No hay comentarios:
Publicar un comentario