Karta Jokoa. Mahaia bedeinkatzeko 42 karta. Erraza zen, baina zail bihurtu zaigu
honako galdera xume honi erantzutea: jateari ekin aurretik otoitz egin behar
ote dugu?
Urte asko ez
direla, erantzuna erraza zitzaigun: bai, dudarik ez. Azken urteetan, haatik,
dudak sortzen zaizkigu. Batetik, otoitza bizitza osoan erabili behar dugulako,
eta ez dago, beraz, jatearekin hasi aurretik esplizituki otoitz egin beharrik;
bestetik, gero eta zailago zaigulako mahai baten inguruan jesartzen garen guztiok
sinestunak izatea, eta, horrelakoetan, otoitz egitea inposaketa izan
litekeelako; eta azkenik, gero eta sarriagotan etxetik kanpo, eskola edo jatetxe batean
kasu, jan behar dugulako, eta horrelakoetan otoitz egitea zelaiz kanpoan
aritzea izan dakigukeelako. Tirabira horiek –edo antzekoak– direla eta, gero
eta gutxiagotan dauzkagu kontuan katiximak
gomendatzen zizkigun otoitz guneak: “Egite onen bat hasten dugun guztian, edo
premia, tentazio, edo arriskuren batean aurkitzen garenean. Batez ere ohetik jaikitzean,
etxetik irtetean, elizan sartzean, jatorduan, eta oheratzean” (honelaxe Astetek)
eta otoitzik gabe geratzen gara.
Aitzakiak
aitzaki, aitortu behar dugu behin baino gehiagotan, sarritan baino sarriagotan
otoitza (maitaleen arteko musuak bezalaxe) mesedegarria zaigula (noiz ikusiko,
bestela, seme-alabek aita eta ama errezotan?). Otoitz gunetxo zahar horiek
ahaztu ahala, maitasun –kristautasun– beroa moteldu egiten zaigu. Dudarik ez,
berreskuratu egin behar ditugu asaba zaharren ohiturok. Horretarako Bilboko Elizbarrutiko
Katekesirako Ordezkaritzak, Mari Patxi Ayerrak prestaturiko 40 otoitzalditxo
eskaintzen dizkigu, nola? eta karta sorta formapean! zein hizkuntzaz? eta
euskaraz (gaztelaniaz ere bai). “Karta hauek eskura, familiak jatorduetako
darabilen mahaitik hurbil eduki beti. Etxeko txikienak, aitonak edo
gonbidatuak... karta bat ausaz hartuko du. Norbaitek astiro-astiro irakurriko
du aukeratutako bedeinkapena”. Testuak laburrak dira, politak ere bai, aitzakia
ederra apurka-apurka berreskuratzeko otoitza egiteko unetxoak. Arratiako
Familia Pastoraltzako taldeak euskeratu ditu kartok.
Sebastian
Gartzia Trujillo